Plantun de Prouvènço

Pèr coumpara dos planto d'encò nostre

Verbascum blattaria & Ranunculus aduncus

Escoubo-d'iero

Verbascum blattaria

Scrophulariaceae

Autre noum : Erbo-dis-arno.

Noms en français : Molène blattaire, Herbe aux mites.

Descripcioun :
L'escoubo-d'iero trachis dins lis ermas e sus lou limas en ribo de ribiero. A de fueio bèn verdo e dentado, de cop tacado de vióulet, sènso péu en floucoun au contro de la maje-part di fatarasso (a pamens de péu glandulous). Se recounèis peréu à si flour, gaire sarrado, e dis estamino vióuleto pourtado pèr de pecou pulèu long.

Usanço :
Escoubo-d'iero, erbo-dis-arno, porto li mémi noum que lou bouioun-blanc. Es uno planto amaro qu'èi pas manjadisso. Acampo li porc-de-sant-Antòni (blata en latin) ço que i'a douna lou noum. Sabèn pas rèn en raport emé lis arno. Pèr escouba l'iero se pòu coumprendre.

Port : Grando erbo
Taio : 30 à 150 cm
Fueio : alterno
Tipe bioulougico : Emicriptoufite
Cicle bioulougico : Renadivo mounoucarpico

Gènre : Verbascum
Famiho : Scrophulariaceae

Ordre : Lamiales

Coulour de la flour : Jauno
Petalo : 5
Ø (o loungour) flour : 3 à 3,5 cm
Flourido : Estiéu

Sòu : Ca
Autour basso e auto : 0 à 1200 m
Aparado : Noun

Liò : Ermas - Camin - Ribiero - Colo
Estànci : Termoumediterran à Coulinen
Couroulougi : TM e CO
Ref. sc. : Verbascum blattaria L., 1753

Ranouncle(-croucu)

Ranunculus aduncus

Ranunculaceae

Noms en français : Renoncule à carpelles crochus, Renoncule crochue.

Descripcioun :
Lou ranouncle-croucu trachis dins li bos clar de colo e de mountagno sus cauquié. Es uno planto coumuno dins soun relarg emai siegue pas toujour couneigudo. Se recounèis à si flour pelouso que porton d'akène forço croucu e à si pecou que soun pas boutis.

Usanço :
Coume tóuti li ranouncle, es uno planto empouisounanto, pamens couneissèn pas d'usanço particuliero. Escriéure au site se n'en sabès mai.